Tu stive llà, n'copp' 'a cchella scanzìa
int'a stà putechella d' 'o Maestro Ercolano
mmiscato mmiez'a ll'ate cchiù o meno comm'a tte.

Ogn'anno é tradizione, sott'e feste 'e Natale
ccà veneno a migliare 'e ggente d'ogni parte;
t'guardano, t'toccano, t'spostano ccà e llà.

Pé lloro 'un si nient'ato ca 'nu pastore 'e creta,
senz'anema purtroppo, senza 'na dignità.

Tra me e te, però, é stato comm'a quanno
s'trovano dduje amice doppe chissà quant'anni.

E ce simmo capito, e ce simmo parlato,
e 'a copp'a stà scanzìa cù mme t'aggio purtato.

Mò, dint'a casa mia, tu nun si cchiù pastore,
n'copp'a cchistu presepio tu si 'nu primm'attore!

Salvatore Russo