M’aggio fatto nu suonno bell’assaie,
m’aggio sunnato ’e sta dint’’o presepio
mmiez’’a ttanti pasture int’’a sti scene
ch’ogni anno ’e ggente d’ogni età
priparano p’’e cchiese e dint’’e ccase
’e stu paese mio primma ’e Natale.

E io, mmiscato llà mmiez’’e pasture
me so fermato annant’’e ccasarelle,
so sciso d’’a muntagna  pè vviarelle
nu poco disaggiate ma assaje bbelle
e so arrivato nnant’’a na puteca
ca ’un ve dico quantu bbene ’e Ddio
tenevano llà ddinto e mmiez’’a via,
e llà vvicino dint’’a na cantina
varrile e vvotte tutte chiene ’e vino.
Nu poco cchiù luntano nu pecuraro
steve durmenno sott’a nu pagliaro
’ncopp’’a nu lietto ’e paglia annant’’o ffuoco,
atturniato ’a na chiorma ’e pecurelle.
Aggio rimasto comm’’a nu ’ncantato
vedenno chella scena accussì bbella,
e mentre me mmiscavo mmiez’’a ggente
ca jeve cù canistre e cù spurtune
vierz’’a na stalla tutta alluminata,
aggio parlato cu na pacchianella
cu a faccia rossa e ’mbraccio na nennella
e ll’aggio addimannato che d’era chella folla
ca carrecata ’e tantu bbene ’e Ddio
jeve a sta grotta quasi ’nprocessione;
a pacchianella m’ha gguardato e ha dditto:
“Comme, signò, ma vuje nunn’’o ssapite
ca dint’’a cchella grotta è nnato nu criaturo?
iss’’è Giesù, ’o vero figlio ’e Ddio
ca pe vvulere Sujo è stato concepito
’a na figliola senza macchia, pura,
e ’o nomme sujo è Maria!”
Io quase ’un ce credevo a sti pparole
’e chella pacchianella campagnola,
ma appena so arrivato nnant’’a grotta
’o core s’è ffermato dint’’o pietto;
che bbella scena, e quanta tennerezza
quann’’aggio visto llà Maria e Giuseppe
e dint’’a mangiatora  nu  criaturo
ca spanneva  na luce e nu calore
ca ’un se po spiegà manco a pparole.
Me song’addenucchiato nnant’’a isso,
e vedenno stu ninno, bello cchiù d’’o sole
aggio esclamato: “Chist’è ’o Salvatore!”